सिरहा : सिरहाको गोलबजारमा आफ्नै घरभित्र हत्या गरिएको अवस्थामा एक महिलाको शव फेला परेको छ । गोलबजार नगरपालिका ६ का महेन्द्रकुमार साहकी श्रीमती अन्दाजी ३५ वर्षकी अनिताकुमारी साहको धारिलो हतियार प्रयोग गरी हत्या भएको हो ।

घर भाडामा लिएर पछिल्लो एक वर्षदेखि होटेल सञ्चालन गर्दै आएका साह दम्पती मात्र घरमा रहेको बेला धारिलो हतियारले गर्दन काटिएको र सिलौटो टाउकोमाथि बजारिएको अवस्थामा भेटिएको इलाका प्रहरी कार्यालय गोलबजारले जनाएको छ । प्रहरीका अनुसार यो घटना हिजो राति साढे १ बजेतिर भएको हो । शव पोष्टमार्टमका लागि लहानस्थित प्रादेशिक अस्पतालमा पठाइएको छ ।

घटनाबारे प्रहरीले विभिन्न कोणबाट अनुसन्धान गरिरहेको सिरहा प्रहरीको भनाइ छ । अनुसन्धानका क्रममा श्रीमानसहित थप एक पुरुष र दुई महिला गरी चार जनालाई प्रहरीले नियन्त्रणमा लिएको छ ।