चितवन : भरतपुर महानगरपालिका ३ र ४ भएर बग्ने पुङ्गी खोला सौन्दर्यकरण आयोजनाको शिलान्यास भएको छ ।आज भरतपुर महानगरपालिका प्रमुख मेयर रेनु दाहालले एक कार्यक्रमका बीच आयोजनाको शिलान्यास गरेकी हुन् ।

समारोहमा दाहालले  पुङ्गी खोला सौन्दर्यकरणको काम सुरु गरिएको बताउदै  खोला सिमाङकन र सौन्दर्यकरणको काम संगसंगै अघि बढाइने जानकारी दिइन् । विभिन्न चरणमा गरी पुङ्गी खोला सौन्दर्यकरणको काम सम्पन्न गरिने उल्लेख गर्दै उन्ले पुङ्गी र ड्रेन  महानगरपालिकाको गौरबको आयोजना भएको बताइन् । 

भरतपुरको पुङ्गी खोला  वडा नम्बर ११,२,हुँदै  ३ र ४ को सिमानाबाट नारायणी नदीमा मिसिएको छ । पुङ्गी खोलाको पाँच किलोमिटर क्षेत्रमा सिमाङकन काम टुंगिएको छ । कार्यपालिकाको निर्णय अनुसार सबै जनप्रतिनिधि र स्थानियको साथसहयोगले  निर्माण सम्पन्न हुने प्रमुख दाहालले विश्वास व्यक्त गरेकी छन्। उनका अनुसार पहिलो चरणमा ३५० मिटरमा खोलाको दुवैतर्फ पर्खाल उठाएर विरुवा लगाइ रेलिडसहितको  फुटपाथ बनाइने छ्  ।

खोला सौन्दर्यकरणको लागि तीन करोड ९७ लाख ७४ हजार रुपैयाँ अनुमान लागतको ठेक्का आह्वान भएको थियो ।  पहिलो चरणमा दुई करोड ४९ लाख ६९ हजार ५ सय १६ रुपैयाँमा खोला  सौन्दर्यकरणको काम गर्न  टिएसएन गिरवान जेभी काठमाडौंले एघार महिनामा काम सक्नेगरी ठेक्का पाएको हो । 

कार्यक्रममा महानगरका प्रमुख प्रशासकिय अधिकृत नरेन्द्र कुमार रानाले संघ र महानगरको बजेटमा खोला सौन्दर्यकरणको काम हुन लागेको बताए । उनले यो योजना सम्पन्न भएपछि महानगरपालिकाको सौन्दर्यमा थप टेवा पुग्ने विश्वास व्यक्त गरे । कार्यक्रम पुङ्गी खोला संरक्षण समितिका संयोजक बिकास थापाको अध्यक्षतामा भएको थियो ।