काठमाडौं- नेपाल आईसीसी अन्डर नाइन्टिन विश्वकपको सुपर सिक्समा प्रवेश गरेको छ । आज भएको समूहको आफ्नो अन्तिम खेलमा नेपालले अफगानिस्तानमाथि एक विकेटको जित हात पारेको हो । यो जितमा आकाश चन्दले ५ विकेट लिए भने देव खनालले अर्धशतक प्रहार गरे ।
दक्षिण अफ्रिकाको बफेलो पार्कमा नेपालले घातक बलिङ गरेपछि टस जितेर ब्याटिङ गरेको अफगानिस्तान ४० ओभर एक बलमा १४५ रनमा अलआउट भयो । पहिलो ओभरमानै गुल्सन झाले नुमन साहलाई शून्यमा आउट गरेर सफलता दिलाएका थिए । दोस्रो ओभरमा आकाशले खालिद तानिवाललाई खाता खोल्ने मौका दिएनन् । आकाशले ३ रन जोडेका जम्सिद जद्रान, ४ रनमा सोहेल खान जुरमाती, शून्यमा अलि अहमद र २० रन जोडेका हसन इसाखिलको विकेट लिएका हुन् ।
आठ ओभर बल फालेका उनले ३४ रन खर्चिएका थिए । सर्वाधिक ३७ रन बनाएका मोहम्मद घजान्फरको विकेट तिलक भण्डारीले लिए । नासिर खानले ३१ रन जोडे । दीपेश कँडेलले दुई, तिलक, सुवास भण्डारी र गुल्सनले एक-एक विकेट लिए । जवाफमा नेपालले ४५ ओभरमा ८ विकेट गुमाएर लक्ष्य पूरा गर्यो ।
ओपनर अर्जुन कुमाल १० रनमै फरिदोन दावे-जाईको हातबाट बोल्ड भए । विपिन रावल दुई रनमै बाहिरिँदै गर्दा नेपालको खातामा कुल १५ रन मात्र थियो । तेस्रो नम्बरमा मैदान प्रवेश गरेका गुल्सन झा एक रनमै खलिल अहमदको हातबाट बोल्ड आउट भए ।
आकाश त्रिपाठी १६ रनमा आउट भए । दीपक डुम्रे पाँच र दीपेश कँडेल ४ रनमा पभेलियन फर्किए । दीपक बोहोराले १६ रन जोडे । चौथो नम्बरमा मैदान प्रवेश गरेका देव खनालले अर्धशतकीय इनिङ खेल्दै नेपाललाई जितसम्म पुर्याएका थिए ।
उनले सात चौका सहयोगमा ५८ रन जोडे । बलिङमा फरिदोनले तीन विकेट लिए, खलिलले तथा असिर खानले समान दुई-दुई विकेट लिए पनि अफगानिस्तानलाई पहिलो जित दिलाउन सकेनन् । तेस्रो खेलमा पहिलो जित दर्ता गरेको नेपाल सुपर सिक्समा प्रवेश गरेको छ ।
नेपाल फरक फर्म्याटको विश्वकपको दोस्रो चरण पुगेको यो तेस्रोपटक हो । नेपालले यसअघि सन् २००० र २०१६ मा पनि पहिलो चरण पार गरेको थियो । समूह डीबाट नेपालसँगै न्युजिल्यान्ड र पाकिस्तान सुपर सिक्स पुग्दा लगातार ३ हार बेहोरेको अफगानिस्तान बाहिरियो । सुपर सिक्स पुगेका १२ टिमलाई दुई समूहमा विभाजन गरिनेछन् । शीर्ष दुई टिमले सेमिफाइनलमा स्थान बनाउनेछन् ।
