काठमाडौं : आईसीसी अन्डर नाइन्टिन विश्वकपमा अफगानिस्तानले नेपाललाई १ सय ४६ रनको लक्ष्य प्रस्तुत गरेको छ । खेलमा नेपालले घातक बलिङ गरेपछि अफगानिस्तान ४० ओभर १ बलमा अल आउट हुँदै १ सय ४५ रनमा समेटियो । खेलमा आकाश चन्द एक्कैले ५ विकेट लिएका थिए ।

टस जितेर पहिले ब्याटिङ रोजेको अफगानिस्तानले २ रनमै २ विकेट गुमाउँदै खराब सुरुआत गरेको थियो । दक्षिण अफ्रिकाको बफेलो पार्कमा पहिलो ओभरमा गुल्सन झाले नुमन साहलाई आउट गर्दै नेपाललाई पहिलो सफलता दिलाएका थिए । दोस्रो ओभरमा आकाश चन्दले खालिद तानिवाललाई पनि खाता खोल्न दिएनन् । आकाशले ३ रनमा जम्सिद जद्रान, ४ रन बनाएका सोहेल खान जुरमाती, शून्यमा अली अहमद र २० रन जोडेका हसन इसाखिललाई पवेलियन फर्काए । इसाखिल मैदान बाहिरँदा अफगानिस्तानले ४३ रन बनाएर ६ विकेट गुमाएको थियो । 

तिलक भन्डारीले ३७ रन बनाउँदै इनिङ सम्हाल्ने प्रयासमा रहेका मोहम्मद घजान्फरलाई क्याच आउट गरे । १०औं नम्बरमा मैदान प्रवेश गरेका फरिदोन दावोदजाइले २९ रनको योगदान गरे। उनलाई ४१औ ओभरमा आउट गराएपछि अफगानिस्तानले सबै विकेट गुमायो । नेपालका लागि दिपेशले २ विकेट लिएका थिए । सुवास भण्डारी र तिलकले समान १-१ विकेट लिए । 

यसअघि न्युजिल्यान्ड र पाकिस्तानसँग पराजित भएको नेपाललाई आजको खेल जित्दै पर्ने दवाव छ । यो खेल जित्ने टोली सुपर सिक्समा प्रवेश गर्नेछ । पराजित हुने टोली प्रतियोगिताबाट बाहिरिनेछ।