काठमाडौं । केही दिनयता काठमाडौं उपत्यकासहित देशका विभिन्न ठाउँमा वायु प्रदूषण अत्यधिक बढेपछि विपद् जोखिम न्यूनीकरण तथा व्यवस्थापन प्राधिकरणले नागरिकलाई सचेत रहन आह्वान गरेको छ ।

प्राधिकरणले काठमाडौं उपत्यका लगायत देशका प्रमुख सहरमा वायुप्रदूषण खतराको तह नजिक पुगेको जनाउँदै सम्भव भएसम्म घरमै बस्न; कार्यालयका कामहरु घरबाटै व्यवस्थापन गर्न; सवारी साधनको प्रयोग कम गर्न; घर, सडक तथा सार्वजनिक स्थानको सरसफाइमा ध्यान दिन आग्रह गरेको छ ।

यसैगरी, अत्याधिक धुलो र धुँवा उत्सर्जन गर्ने निर्माण कार्य केही समयलाई स्थगन गरी वातावरणमैत्री हुनेगरी नियमन गर्न प्राधिकरणले आग्रह गरेको छ ।

प्राधिकरणले सूचना जारी गर्दै फोहरमैलाको सही व्यवस्थापन गर्न एवं फोहरमैला नजलाउन, वन डढेलो लाग्नै नदिन र लागिहाले सावधानीपूर्वक नियन्त्रण गर्न भनेको छ । यस्तै, बालबच्चा, वृद्धवृद्धा र संवेदनशील स्वास्थ्य समस्या भएकाहरुको विशेष हेरचाह गर्न र प्रदूषण बढेको बेला घरबाहिर निस्कँदा सुरक्षित मास्कको प्रयोग गर्न प्राधिकरणले सबैमा अनुरोध गरेको छ । 

काठमाडौं उपत्यकाको प्रदूषित हावाका कारण आकाश धुम्म छ । वायु प्रदूषणका कारण आज बिहान काठमाडौंबाट हवाइ उडानसमेत प्रभावित भएको थियो । केही दिनयता काठमाडौं शहर विश्वकै प्रदूषित शहरको सूचीमा रहँदै आएको छ । वायु प्रदूषणका कारण मानिसहरुमा आँखा पोल्ने, टाउको दुख्नेजस्ता समस्या देखिएका छन् । आज बिहान पनि काठमाडौंको प्रदूषण खतरनाकको तहभन्दा माथि पुगेको थियो । प्रदूषण बढेसँगै दीर्घरोगी, गर्भवती र बालबालिकालाई बढी असर पर्ने भन्दै चिकित्सकहरुले समेत सकेसम्म घरभित्रै बस्न आग्रह गरेका छन् ।

स्वास्थ्य तथा जनसंख्या मन्त्रालयले पनि काठमाडौं उपत्यकामा वायु प्रदूषण बढे‌सँगै उच्च सतर्कता अपनाउन सबैलाई आग्रह गरेको छ