एजेन्सी-म्यानमारमा गएको ७.७ म्याग्निच्युडको शक्तिशाली भूकम्पका कारण मृत्यु हुनेको संख्या १४४ पुगेको छ । म्यानमारको सैन्य सरकारले ७ सयभन्दा बढी घाइते भएको जनाएको छ ।

छिमेकी थाइल्यान्ड र चीनमा भूकम्पको तीव्र धक्का महसुस गरिएको जनाइएको छ । भूकम्पको केन्द्रबिन्दु सागाइङ्ग शहरबाट करीब १६ किलोमिटर उत्तरपश्चिममा १० किलोमिटरको गहिराइमा रहेको यूएसजीएसले जनाएको छ । 

स्थानीय समयअनुसार करीब १२ बजेर ५० मिनेटमा भूकम्प गएको हो । म्यानमारको राजधानी नेपिदका केही सडकमा चिरा परेको जनाइएको छ । यसैगरी छिमेकी थाइल्यान्डको राजधानी बैंककका केही भवनमा क्षति पुगेको जनाइएको छ । बैंककमा एउटा निर्माणाधीन बहुतल्ले भवन खसेको र त्यहाँ ८१ जना कामदार पुरिएका छन् । 

बै‌ंककमा भूकम्पबाट अत्तालिएर सयौं मानिस आआफ्नो घरबाट बाहिर सडकमा आएको जनाइएको छ ।