काठमाडौं– राजतन्त्र पक्षधरहरुले शुक्रबार गरेको प्रदर्शन हिंसात्मक हुँदा २ जनाको मृत्यु भएको छ भने २७ जना घाइते भएका छन् ।
तिनकुनेस्थित एक भवनमा प्रदर्शनकारीले लगाएको आगोमा जली एभेन्युज टेलिभिजनका पत्रकार सुरेश रजकको मृ्त्यु भएको छ भने प्रहरीको गोली लागेर कीर्तिपुरका सविन महर्जनको मृत्यु भएको हो । यस्तै, घाइतेमध्ये पाँच जनाको सिभिल अस्पताल र २ जनाको राष्ट्रिय ट्रमा सेन्टरमा उपचार भइरहेको छ । ट्रमामा उपचाररत घाइतेमध्ये एक जनाको अवस्था गम्भीर छ ।
शुक्रबार बिहान तीनकुनेमा सभाका लागि जम्मा भएका राजतन्त्र समर्थक प्रदर्शनकारीले सुरक्षाघेरा तोड्न खोजेपछि झडप भएको थियो । त्यसक्रममा प्रहरीले अश्रुग्यास तथा पानीका फोहोरा प्रहार गरेको थियो भने प्रदर्शनकारीले ढुगामुडा प्रहार गरेका थिए । त्यसक्रममा प्रदर्शनकारीले कान्तिपुर टेलिभिजनमा ढुंगामुडा गरेका थिए भने अन्नपूर्ण पोस्ट जलाउन खोजेका थिए ।यस्तै, भाटभटेनीमा तोडफोड तथा लुटपाट गरेका थिए । यस्तै, पेरिसडाँडा क्षेत्रका सवारीसाधनमा आगजनी गर्नुका साथै एकीकृत समाजवादीको कार्यालयमा आगजनी गरेका थिए । बालकुमारी पनि गाडी जलाएका प्रदर्शनकारीले जडिबुटी कम्पनीमा पनि आगजनी गरेका थिए ।
आन्दोलन सुरु भएपछि नै प्रहरीले मञ्चमा टिअर ग्यास प्रहार गरेपछि राजावादीहरु उग्र बनेका थिए । त्यसपछि अवस्था नियन्त्रण बाहिर गयो । प्रदर्शनकारीले प्रहरीले लुकेर गोली र अश्रुग्यास प्रहार गरिरहेको भन्दै तिनकुनेको घरमा तोडफोड र आगजनी गरेका थिए ।
प्रदर्शनकारीले व्यक्तिका घर, पसल, सञ्चार गृह र सरकारी सम्पत्तिमा आगजनी गरेका थिए ।
नवराज सुवेदी नेतृत्वको संयुक्त जनआन्दोलन समितिले व्यवसायीलाई दुर्गा प्रसाईंलाई आन्दोलनमा जनपरिचालनको जिम्मा दिएको छ ।
