काठमाडौैं-प्रधानमन्त्री केपी शर्मा ओलीले कुलमान घिसिङलाई हटाएको प्रकरणमा संसदमा आएर जवाफ नदिने बताएका छन्।
एमाले निकट युवा संघले तीनकुनेस्थित रोयल पार्टी प्यालेसमा आयोजना गरेको ‘राष्ट्रिय स्वयंसेवक भेला’ लाई सम्वोधन गर्दै प्रधानमन्त्री ओलीले सरकारले नियुक्ति गरेपछि त्यो प्रसंग सकिने बताएका हुन् । विपक्षी दलले प्रधानमन्त्रीले जवाफ दिनुपर्ने माग गर्दै सदन अवरुद्ध बनाइरहेका बेला ओलीले उक्त कुरा बताएका हुन् ।
ओलीले भने- एउटा कर्मचारीलाई कारबाही गर्यो अरे सरकारले । त्यसको विधि अर्को होला नि, पार्लियामेन्ट बन्द गर्या छ ! प्रधानमन्त्रीले आएर जवाफ दिनपर्यो रे ! जवाफ दिइसक्यो प्रधानमन्त्रीले । दिइसक्यो, सिद्धियो त । अब कहाँ पार्लियामेन्टमा जवाफ दिने त्यो कुरा ? थाहा पाइएनन् ? एउटा हटायो, अर्को नियुक्त गर्यो, सिद्धियो ।
उनले प्रधानमन्त्रीका बारेमा जथाभावी पनि नबोल्न पनि विपक्षीलाई चेतावनी दिए । उनले भने- म आग्रह गर्न चाहन्छु प्रतिपक्षलाई यति सस्तो, यति हल्का, यति उत्ताउलो नहुनुस् तपाईंहरू । र, प्रधानमन्त्रीको बारेमा जथाभावी पनि नबोल्नुस् । थाहा छ तपाईंहरूको पृष्ठभूमि । के गर्न हिँड्नुभएको थियो, कता हिँड्नु भएको थियो, कहाँ आइपुग्नु भएको छ, त्यो पनि देख्या छ ।
