काठमाडौं । नेपाल विद्युत् प्राधिकरणबाट कुलमान घिसिङलाई हटाउनुको कारणबारे प्रधानमन्त्रीको जवाफ माग गर्दै विपक्षी दलले अवरोध गरेपछि प्रतिनिधि सभा बैठक भोलिसम्मका लागि स्थगित भएको छ । बिहान ११ बजे बस्ने भनिएको बैठक विपक्षी दलहरूले संसद् अवरोध गर्ने जनाएपछि केही ढिला गरी बस्यो ।
बैठकको सुरुमै विपक्षी दलका सांसदहरूले उठेर अवरोध गरेपछि सभामुख देवराज घिमिरेले माओवादी सांसद शक्तिबहादुर बस्नेतलाई बोल्न समय दिए । सांसद बस्नेतले राम्रो काम गर्दागर्दै पनि स्वार्थ समूहका लागि कुलमान घिसिङलाई हटाइएको भन्दै सरकारको निर्णय सच्याउन माग गरे । उनले यस विषयमा प्रधानमन्त्रीको जवाफ नआएसम्म सदन चल्न नदिने चेतावनी दिए ।
विपक्षी सांसदले अवरोध जारी राखेपछि सभामुखले ३० मिनेटका लागि बैठक स्थगित गरे । पुनः ३ बजेको बसेको बैठकमा पनि निरन्तर अवरोध गरेपछि सभामुख देवराज घिमिरेले बैठक स्थगित गरी बिहीबार ११ बजेका लागि बोलाएका हुन् ।
राष्ट्रिय सभामा पनि विपक्षी दलले कुलमान घिसिङलाई हटाएको विषयमा प्रधानमन्त्री ओलीको जवाफ माग गर्दै निरन्तर अवरोध गरेपछि बैठक भोलिसम्मका लागि स्थगित गरिएको छ ।
