काठमाडौँ–काठमाडौँको चन्द्रागिरि नगरपालिका–२ नागढुङ्गामा आज साँझ भएको सवारी दुर्घटनामा एक जनाको मृत्यु भएको छ भने नौ जना घाइते भएका छन्।
चितवनबाट काठमाडौँ आउँदै गरेको ग १ ख ५५४६ नं को हाइस रोकेको अवस्थामा आफैँ गुडेर सडक छेउको पेटीमा ठोकिँदा ठेगाना नखुलेकी अन्दाजी २५-२६ वर्षीया सविना गुरूङको मृत्यु भएको हो।
दुर्घटनामा गम्भीर घाइते भएकी गुरूङको उपचारका क्रममा ट्रमा सेन्टरमा मृत्यु भएको जिल्ला प्रहरी परिसर काठमाडौँका प्रवक्ता, प्रहरी उपरीक्षक अपीलराज बोहराले जानकारी दिए। उनका अनुसार दुर्घटनामा नौ जना घाइते भएका छन्। घाइतेमध्ये केहीको ट्रमा सेन्टर र केहीको अन्नपूर्ण न्यूरोमा उपचार भइरहेको छ।
हाएस चालक जिल्ला नुवाकोट बेलकोटगढी नगरपालिका-१३ घर भएका ३० वर्षीय राजेश घले गुरुङलाई सवारीसाधनसहित प्रहरी वृत्त थानकोटले नियन्त्रणमा लिएको जनाएको छ।
दुर्घटनाका घाइतेहरुमा चितवन कालिका नगरपालिका-७ की ६८ वर्षीया तारादेवी कुमाल‚ चन्द्रागिरि नगरपालिका-१५ कि विन्दु देवकोटा र ३० महिनाका उनका छोरा दिव्यन पोख्रेल‚ भरतपुर महानगरपालिका-६ की ४० वर्षीया अनिता थापा र उनकी १७ वर्षीया छोरी एरिसा थापा‚ भरतपुर महानगरपालिका-४ का ३७ वर्षीय मोहित गुरुङ‚ कालिका नगरपालिका-७ की २५ वर्षीया सीमा कुमाल र उनका ६ वर्षीय छोरा इसान कुमाल‚ सर्लाहीको सोल्टी बजारकी २० वर्षीया कुसुम राई घाइते रहेका छन्।
