एजेन्सी-दिल्ली उच्च अदालतका न्यायाधीश यशवंत वर्माको घरबाट करिब १५ करोड रुपैयाँ नगद बरामद भएको छ । यो घटना सार्वजनिक भएपछि सर्वोच्च अदालतले उनलाई इलाहाबाद उच्च अदालतमा फिर्ता पठाउने निर्णय गरेको छ।
साथै, न्यायाधीश वर्माविरुद्ध प्रारम्भिक अनुसन्धान सुरु गरिएको छ । यद्यपि, यो आन्तरिक छानबिन होइन। छानबिन पूरा भएपछि दिल्ली उच्च अदालतले मुख्य न्यायाधीश कलेजियमलाई प्रारम्भिक प्रतिवेदन पेस गर्नेछ।
होलीको बिदामा न्यायाधीश वर्माको सरकारी निवासमा आगलागी भएको थियो । त्यतिबेला उनी घरमा थिएनन् । आगो लागेपछि परिवारले दमकललाई खबर गरेका थिए । आगो निभाउन गएको टोलीले १५ करोड नगद फेला पारेको थियो ।
सर्वोच्च अदालतको ५ सदस्यीय कलेजियमले उनलाई सरुवा गर्ने निर्णय गरेको हो, यद्यपि यो सर्वोच्च अदालतको वेबसाइटमा अपलोड गरिएको छैन।
उता, हाईकोर्ट बार एसोसिएसनले न्यायाधीश वर्मालाई इलाहाबाद फिर्ता सरुवा गरेकोमा विरोध गरेको छ। कलेजियमको निर्णय पछि उनीहरूले भनेका छन, के हामी डस्टबिन हौं ?’
