
काठमाडौँ । प्रधानमन्त्री केपी शर्मा ओलीले एसइई धैर्यताका साथ तयारी गरी दिन विद्यार्थीलाई आग्रह गरेका छन् ।
आज साँझ भिडियो सन्देश जारी गर्दै प्रधानमन्त्री ओलीले ७ गतेदेखि सञ्चालन हुने एसइई परीक्षामा सहभागी हुने विद्यार्थीलाई धैर्यताका साथ नआत्तिकन, राम्रो तयारी गरेर दिन आग्रह गरेका हुन् ।
“विद्यार्थी भाइबहिनीहरू चैत ७ गतेदेखि एसइईको परीक्षा सुरू हुँदैछ । तपाईंहरू त्यसैको तयारीमा जुट्नु भएको छ” प्रधानमन्त्री ओलीले भनेका छन्, “तपाईंहरूसँग खेर फाल्ने समय छैन । राम्रो अङ्क प्राप्त गरेर सफलतापूर्वक उत्तीर्ण हुनुहोस् । मेरो धेरै शुभकामना छ ।”
प्रधानमन्त्रीले विद्यार्थीलाई अनिँदो, थकित अवस्थामा राम्रो परीक्षा दिन गाह्रो हुनेभएकाले त्यसबाट जोगिन समेत उनको आग्रह छ। उनले विद्यार्थीले धेरै परीक्षा उत्तीर्ण गरेर यहाँ आइसकेको भन्दै परीक्षासँग नतर्सिनु पनि आग्रह गरे ।
“पहिले पहिले एसएसलीलाई फलामे ढोका भनिन्थ्यो, त्यो शब्दले पनि विद्यार्थीमा अलिकति त्रास पैदा हुन्थ्यो । तपाईंहरू परीक्षासँग नतर्सिनुहोस्” प्रधानमन्त्रीले भनेका छन्, “परीक्षा जीवनका कदम कदम मोडमोडमा आइरहने चीज हो । धेरै परीक्षा उत्तीर्ण गरेर तपाईहरू यहाँ आइसक्नुभएको छ ।”