काठमाडौँ —स्वतन्त्र विद्यार्थी यूनियनको मंगलबार भएको निर्वाचनको नतिजा आउने क्रम जारी छ ।
आंगिक क्याम्पस आयुर्वेद क्याम्पस कीर्तिपुरमा नेविसंघ र ललितकला क्याम्पस भोटाहिटीमा अनेरास्ववियुका उम्मेदवार स्ववियु अध्यक्षमा निर्वाचित भएका छन् । आयुर्वेद क्याम्पसमा निशान अर्याल र ललितकला क्याम्पसमा आशिष पौडेल अध्यक्षमा निर्वाचित भएका हुन् ।
इन्जिनियरिङ अध्ययन संस्थानअन्तर्गत पुल्चोक इन्जिनियरिङ क्याम्पसमा स्वतन्त्र उम्मेदवार र स्वयं श्रेष्ठ निर्वाचित भएका छन् । सचिवमा माओवादीनिकट अखिल क्रान्तिकारीका उम्मेदवार दिवस सापकोटा विजयी बनेको क्याम्पसले जनाएको छ ।
थापाथली इन्जिनियरिङ क्याम्पसको अध्यक्षमा नेविसंघ र सचिवमा अखिल क्रान्तिकारीका उम्मेदवार विजयी भएका छन् । अध्यक्षमा नेविसंघका प्रह्राद खड्का निर्वाचित भएका हुन् भने सचिवमा अखिल क्रान्तिकारीका जेसिस उपाध्याय निर्वाचित भएका छन् ।
सल्यानका दुई क्याम्पसमा अखिल क्रान्तिकारी, एकमा नेबिसंघ र एकमा अनेरास्ववियुका विद्यार्थी अध्यक्षमा निर्वाचित भएका छन् । शिवजन बहुमुखी क्याम्पसमा नेविसंघका संजय हमाल, सल्यान बहुमुखी क्याम्पसमा अनेरास्ववियुका विशाल पुन, जनकल्याण क्याम्पस थारमारेमा अखिल क्रान्तिकारीका गणे वली र फारुला क्याम्पस दार्मामा अखिल क्रान्तिकारी विद्यार्थी संगठनकी हीमा शर्मा अध्यक्षमा निर्वाचित भएका हुन् ।
कालिकोटसान्नीत्रिवेणीस्थित जनचेतना बहुमुखी क्याम्पस मेहलमुडीमा अखिल क्रान्तिकारीको टिम विजयी भएको छ ।
लमजुङ सुन्दरबजारस्थित कृषि तथा पशु विज्ञान अध्ययन संस्थान (लमजुङ क्याम्पस) मा नेविसंघ प्यानलै विजयी भएको छ ।
दार्चुलामा तीन वटा विद्यार्थी संगठनबीच भागबन्डा गर्ने सहमति भएअनुसार नेतृत्व चयन भएको छ । पाँच क्याम्पसमध्ये नेविसंघ र अनेरास्ववियुले दुई/दुई र अखिल क्रान्तिकारीले एक क्याम्पसमा स्ववियुको नेतृत्व गर्ने भएका छन् । जसअनुसार ब्यास गाउँपालिकामा रहेको अपीनाम्पा क्याम्पस हुतीमा नेविसंघका शेखर बम स्ववियु अध्यक्ष चुनिएका छन् । राष्ट्रिय क्याम्पस दत्तुमा नेविसंघकी लिलु भट्ट स्ववियु अध्यक्ष चुनिएकी क्याम्पस प्रमुख जानकी कार्कीले जानकारी दिइन् । त्यस्तै लटिनाथ क्याम्पस मार्मामा अनेरास्ववियुका रुकेश विष्ट र कृष्ण स्नातक क्याम्पस लालीमा ओमकार पाल स्ववियु अध्यक्ष चुनिएका छन् । त्यसैगरी अखिल क्रान्तिकारी शंकरपुर क्याम्पस पस्तीमा स्ववियु अध्यक्ष चुनिएको छ ।
प्यूठान क्याम्पस खलंगा प्यूठानमा नेविसंघका प्रमोद ओली विजयी भएका छन् ।
सिन्धुपाल्चोकको मेलम्ची र जलवीरे क्याम्पसमा सत्ता गठबन्धनका उम्मेदवारलाई पराजित गर्दै अखिल क्रान्तिकारीका नेता स्ववियु सभापतिमा विजयी भएका छन् ।
हेटौंडाको निर्मल बहुमुखी क्याम्पसको स्ववियु अध्यक्षमा अनेरास्ववियुका प्रशान्त भण्डारी विजयी भएका छन् ।
