
काठमाडौं-पूर्वराजा ज्ञानेन्द्र शाह आज पोखराबाट काठमाडौं फर्कने क्रममा राप्रपासहित विभिन्न समूहहरुले प्रदर्शनको तयारी गरेपछि सुरक्षाकर्मीलाई ‘हाई अलर्ट’मा राखिएको छ ।
आज बिहानैदेखि काठमाडौंको नारायणहिटी दरबार संग्रहालय, त्रिभुवन अन्तर्राष्ट्रिय विमानस्थलसहितका क्षेत्र र मुख्य चोकहरुमा सुरक्षाकर्मीको तैनाथी बढाइएको हो । बिहानैबाट काठमाडौंका चोकचोकमा बर्दीसहितका र सादा पोशाकका गुप्तचर टोली परिचालित छन् । काठमाडौं र भिडभाड र जुलुस अनियन्त्रित हुनसक्ने आशंकामा आवश्यक सुरक्षा रणनीति बनाइएको प्रहरीले जनाएको छ ।
पूर्वराजा शाहको स्वागतका लागि काठमाडौंका विभिन्न स्थानबाट जुलुससहित त्रिभुवन अन्तर्राष्ट्रिय विमानस्थलको गेट अगाडि भेला हुने तयारीमा छन् । भिड अनियन्त्रित भए आवश्यक परे चारवटै सुरक्षा निकाय परिचालित गर्नेसमेत तयारी भएको बताइएको छ ।