चितवन : रेष्टुरेन्ट एण्ड बार एशोसियसन(रेवान) सौराहाको आयोजनामा चितवनको सौराहामा फुड फेस्टिभल (खाना महोत्सव) सुरु भएको छ ।
महोत्सवको बागमती प्रदेशका सांस्कृतिक तथा पर्यटनमन्त्री विमल ठकुरीले उद्घाटन गरेका हुन् । सो अबसरमा उनले सौराहा बागमती प्रदेशको एकमात्र पर्यटकीय गन्तव्य रहेको भन्दै सौराहाको सफारी पर्यटनलाई विकासको उचाईमा पुर्याउन सरकारले कुनै कसुर बाँकी नराख्ने बताए ।
सौराहाको पर्यटनमार्फत प्रदेशको आर्थिक अबस्था मजबुत बनाउने उनको भनाइ छ । लोक संस्कृतिमार्फत् पर्यटनको विकास गर्न सकिने भन्दै उनले सौराहाको विकासको लागि गुरुयोजना बनाएर काम गर्न सरकार तयार रहेको बताए । चितवनमा १५३ वटा योजनामा २० करोड रुपैया विनियोजन भएर काम सुरु भइसेकको भन्दै उनले त्यसमा पर्यटन विकासका योजना समेत समाबेश गरिएको बताए ।
कार्यक्रममा बातमती प्रदेशका सांसद तथा पूर्वमन्त्री जगन्नाथ थपलिया र बागमती प्रदेशका सांसद तथा पूर्वमन्त्री कृष्णप्रसाद खनालले सौराहाको पर्यटन विकासको लागि आवश्यक सहयोग गर्ने बताएका छन् ।
रेवानका केन्द्रीय अध्यक्ष संघर्ष विष्टले पर्यटनको पर्यटन उद्योगको विकासका लागि सरकारले पूर्वाधार निर्माणमा ध्यान केन्द्रीत गर्नुपर्ने बताए । रेवान सौराहाका अध्यक्ष ध्रुव गिरीले सौराहाको पर्यटन विकासका लागि सरकारी स्तरबाट गुरुयोजना निर्माण गर्नुपर्ने बताए । सौराहाको पर्यटन खुम्चिएको उल्लेख गर्दै उनले यसको दायरा बढाउने गरी गुरुयोजना निर्माण गरेर काम गर्नुपर्ने बताए । फेस्टिबलका संयोजक शम्भूप्रसाद मालीले सौराहामा पर्यटक भित्र्याउन फुड फेस्टिबल आयोजना गरिएको भन्दै फेस्टिवलले सौराहा ४० प्रतिशत पर्यटक बृद्धि हुने बताए ।
कार्यक्रममा जिल्ला समन्वय समितिका सभापति नारायणप्रसाद अधिकारी, वडा नं ७ का वडाध्यक्ष सजना महतो, सोही वडाका निर्वतमान अध्यक्ष तथा रेवान सौराहाका पूर्वअध्यक्ष राजन भट्ट, मध्यवर्ती क्षेत्र व्यवस्थापन समितिका अध्यक्ष प्रकास ढुंगाना, क्षेत्रीय होटल संघका अध्यक्ष गंगा गिरी, रेवान महिला समुहकी अध्यक्ष लक्ष्मी विडारी लगायतले मन्तव्य राखेका थिए ।
फेस्टिभल उद्घाटनपूर्व सौराहामा बृहद शोभायात्रा निकालिएको थियो। “प्राकृतिक सौन्दर्यता, चितवन सौराहाको विशेषता” लाई आत्मसाथ गर्दै सौराहास्थित पर्यटक बस पार्क जाने बाटोको उत्तर तर्फको खाली जग्गामा फेस्टिभल सुरु भएको हो । समग्र सौराहाको पर्यटन विकास गर्ने, विभिन्न जातजातीका परम्परागत तथा स्थानीय, स्वदेशी, विदेशी खानाको प्रवद्र्धन गर्ने, स्थानीय कलासँस्कृति/भेषभुषाको जगेर्ना गर्दै पर्यटकीय गन्तव्यको रुपमा सौराहालाई राष्ट्रिय तथा अन्तराष्ट्रिय स्तरमा पहिचान गराउने, प्रवेश टिकटबाट भएको आम्दानीले यस वर्ष पनि सौराहाको पर्यटन मार्ग सौन्दर्यकरण गर्ने उद्देश्यले फेस्टिबल आयोजना गरिएको सहसंयोजक भट्टले बथाए ।
फागुन ३ गते सम्म चल्ने फेस्टिबलमा बहुल जातजातीहरुको झाँकीका साथै सिन्धुलीको कर्ने मगर बाजाको प्रस्तुति, राष्ट्रिय तथा स्थानीय कलाकारहरुको साँगीतिक प्रस्तुति, स्थानीय जनजातीका खाना प्रदर्शनी तथा प्रतियोगिता, वेटर/वेटरेस बीच प्रतियोगिता, प्रथम रेवान कप महिला फुटवल प्रतियोगितालगायत हुनेछ । कार्यक्रम अवधिभर अनुमानित ३ करोढ सम्म कारोबार हुने अपेक्षा गरिएको छ ।
फेस्टिभल अबलोकनका लागि सौराहामा दैनिक ५ हजार स्वदेशी तथा विदेशी पर्यटक भित्रिने रेवान सौराहाका महासचिव नविन नेपालले जानकारी दिए । रत्ननगर नगरपालिका संरक्षक रहेको सो फेस्टिभलको सहआयोजकमा रेवान महिला समुह, क्षेत्रीय होटल संघ सौराहा र युनाईटेड हात्ती सञ्चालन सहकारी संस्था रहेका छन् । फेस्टिबल अबधिभर सौराहाका व्यसायीहरुले आवास र खानामा १० प्रतिशत छुट सुविधा समेत सार्वजनिक गरेका छन् । रेवानका महासचिव नेपालले सञ्चालन गरेको उद्घाटन कार्यक्रम अध्यक्ष गिरीको अध्यक्षतामा भएको थियो ।
