काठमाडौं - अमेरिकाको भर्जिनियाको स्यानटिली शहरमा पोखरीमा गाडी डुब्दा २ नेपालीको मृत्यु भएको छ ।
अमेरिकाबाट प्रकाशित हुने अनलाइन एनबिसिवाशिंगटनलाई उधृत गर्दै ईनेपलिज डट कमले जनाएअनुसार ५५ वर्षका कर्ण खड्का र २० वर्षीय निश्चल भट्टको निधन भएको हो ।
जनवरी ९ को बिहान एउटा अतिथि गृह(होटल) बाहिरको पोखरीमा कार डुबेको अवस्थामा फेला परेपछि दुई जनाको मृत्यु भएको प्रहरीले जनाएको छ। समाचारका अनुसार जनवरी ९ बिहान ७:३० बजेतिर सेन्टरभ्यू ड्राइभ(मार्ग)मा रहेको विङ्गेट बाई विन्डह्याम अतिथि (गृह)नजिकै रहेको चिसो पोखरीमा गाडी बरफमा चिप्लिएर चिसो पोखरीमा पुगेको फेयरफ्याक्स काउन्टी प्रहरीले जनाएको छ। कार आंशिक रूपमा हिउ जमेको पानीमा डुब्दा चालक ५५ वर्षीय कर्ण खड्का र यात्रु २० वर्षीय निश्चल भट्ट भित्र फसेका थिए।
उद्धार टोली पुग्दासम्म उनीहरूको मृत्यु भइसकेको प्रहरीले बताएको छ। एनबिसीवाशिंगटनका अनुसार सहकर्मीहरूले खड्का विङ्गेटमा काम गरेको बताए । २० वर्षीय भट्टले जागिरको लागि आवेदन दिने योजना बनाएकाले उनीसँग आएको समाचारमा उल्लेख छ ।
