रत्ननगर-पूर्वी चितवनको रत्ननगरमा दुई लाख पुरस्कार राशीको तेस्रो अन्तरपालिका मेयर कप फुटबल प्रतियोगिता सुरु भएको छ । प्रतियोगिताको रत्ननगरका मेयर प्रलाद सापकोटाले उद्घाटन गरे ।
सो अबसरमा मेयर सापकोटाले खेलकुद क्षेत्रको विकास र राष्ट्रिय स्तरमा प्रतिस्पर्धा गर्न सक्ने खेलाडी उत्पादन गर्ने उद्देश्यले मेयरकप आयोजना गरिएको बताए । मेयर कपको पहिलो खेलमा कालिका नगरपालिका विजयी भएको छ । आयोजक रत्ननगर नगरपालिकालाई ट्राइब्रेकरका आधारमा ४ का विरुद्ध ५ गोलले पराजित गर्दै कालिका नगरपालिका विजयी भएको हो । निर्धारित समयमा दुबै टिमबाट एक-एक गोलको बराबरी भएपछि खेल ट्राइब्रेकरमा पुगेको थियो ।
प्रतियोगिताबाट आयोजक रत्ननगर नगरपालिका बाहिरिएको छ । स्वास्थ्यका लागि खेलकुद, राष्ट्रका लागि खेलकुद भन्ने मूल नाराका साथ आर्थिक वर्ष २०८१-०८२ को वार्षिक कार्ययोजना अन्तर्गत तेश्रो अन्तरपालिका स्तरीय मेयर कप फुटबल प्रतियोगिता आयोजना गरिएको खेलकुद विकास समितिका अध्यक्ष कृष्ण चौधरीले जानकारी दिए ।
नेपाल माविको खेल मैदानमा सुरु भएको प्रतियोगितामा चितवनका सात पालिकासहित हेटौडा उपमहानगरपालिका, मनहरी गाँउपालिका र गैडाकोट नगरपालिका गरी १० वटा टिमले प्रतिस्पर्धा गर्ने संयोजक चौधरीले जानकारी दिए ।
प्रतियोगितामा प्रथम हुने टिमलाई २ लाख ११ हजार १११, द्वितिय हुने टिमलाई १ लाख ५१ हजार १११ सहित पदक, ट्रफि र प्रमाणपत्र प्रदान गरिने नगर स्तरीय खेलकुद विकास समितिका सहसंयोजक सौगात भूजेलले जानकारी दिए । प्रतियोगितामा प्लेयर अफ द म्याच घोषित हुने खेलाडीलाई २ हजार ५०० र प्लेयर अफ द टुर्नामेन्ट घोषित हुने खेलाडीलाई १० हजार ५०० प्रदान गरिने उनले जानकारी दिए ।
