काठमाडौं- मानव तस्करीको आरोप लागेका कोशी प्रदेशका निवर्तमान आन्तरिक मामिला तथा कानुनमन्त्री लीलाबल्लभ अधिकारीलाई नेकपा एमाले कोशी प्रदेशले निलम्बन गरेको छ । 

एमाले कोशी प्रदेश कार्यालयले विज्ञप्ति जारी गरी अधिकारीले मन्त्रीको हैसियतमा पदीय मर्यादा विपरीत जापान भ्रमण गरेको भन्दै पार्टीको कुनै पनि तहमा रहन नपाउने गरी निलम्बन गरिएको जनाएको हो । 

'मानव तस्करीजस्तो गम्भीर आरोपका सम्बन्धमा शीघ्र छानबिन तथा गहिरो अनुसन्धान गरी सत्यतथ्य सार्वजानिक गर्न नेपाल सरकार र सम्बन्धित निकायको गम्भीरतापूर्वक ध्यानाकर्षण गराउँद छौं,' एमाले कोशी प्रदेशका अध्यक्ष घनश्याम खतिवडाद्वारा हस्ताक्षरित विज्ञप्तिमा भनिएको छ, 'उपरोक्त आरोपको अन्तिम निरुपण नभएसम्मका लागि पार्टीको कुनै पनि तहमा रहन नपाउने गरी वहाँलाई राष्ट्रिय महाधिवेशन प्रतिनिधि परिषद सदस्य तथा नेकपा एमालेको संगठित सदस्यताबाट समेत निलम्बन गरिएको जानकारी गराइन्छ ।'

अधिकारी कोशीका मुख्यमन्त्री र पार्टीलाई समेत जानकारी नदिई जापान भ्रमणमा गएका थिए । उनीसगै फर्जी कागजात बनाई तीन जना व्यक्तिसमेत जापान गएको र उनीहरुलाई जापानको एयरपोर्टबाटै फिर्ता पठाइएको थियो । 

जापानबाट फिर्ता आएका तीन जना र कीर्ते कागजात बनाउने अन्य तीन जनालाई पक्राउ गरी प्रहरीले मानव तस्करीको आरोपमा अनुसन्धान गरिरहेको छ । विवाद उठेपछि मन्त्री पदबाट राजीनामा दिएका अधिकारीलाई समेत अनुसन्धान हुनुपर्ने चौतर्फी दबाब बढिरहेका बेला पार्टीको कोशी प्रदेश कार्यालयले निलम्बन गरेको हो ।

एमाले कोशी प्रदेशले गरेको निलम्बनको कारबाहीलाई शनिबारै बसेको एमाले सचिवालयको बैठकले अनुमोदन गरेको थियो।