काठमाडौं । थाई एयर एसियाले आइतबार गौतमबुद्ध अन्तराष्ट्रिय विमानस्थलमा बैंकक-भैरहवा उडान सुरु गरेको छ ।
थाई एयर एसियाको एयर बस ३२० बाट आज बिहान सात बजे पहिलो उडान गरेको हो । चालक दलका सात सदस्य पाइलट, को-पाइलट, ईञ्जिनियर र चार जना एयर होस्टेससहित आएको विमान आधा घण्टापछि बैंकक फर्किएको गौतमबुद्ध अन्तराष्ट्रिय विमानस्थलले जनाएको छ ।
सोमबारदेखि टिकट बुकिङ खोल्दै अर्को उडान कार्तिक २३ गते बिहान सात बजेर पाँच मिनेटमा गर्ने जनाएको छ । शुक्रबारको उडान बिहान गर्ने तालिका रहे पनि प्रतिकूल मौसमले असर नगरोस् भनेर मध्यान्हमा गर्ने जनाएको छ । २३ गतेपछि भने हप्ताको सोमबार र बिहिबार सवा १२ बजे अवतरण गर्ने तालिका रहेको विमानस्थलले जनाएको छ ।
अवतरण गरेको एक घण्टापछि विमान बैंकक प्रस्थान गर्ने छ । कार्तिक २४ देखि हप्ताको तीन दिन जजिराले तथा कार्तिक २५ गतेदेखि फ्लाई दुबईले हप्ताको सातै दिन उडान गर्ने तालिका रहेको छ ।
