हेटौंडा- मकवानपुरको मनहरीमा भैंसीले बाघको मारेको छ । आफूलाई आक्रमण गर्न आएको बाघलाई प्रतिकार गरेर भैंसीले मारेको प्रहरीले जनाएको छ ।

बिहीबार बिहान मनहरी गाउँपालिका–६ प्रतापुरका बलबहादुर राईको गोठमा बाँधेको भैंसीलाई आक्रमण गर्न बाघ गएको थियो । बाघ र भैंसीको जुधाजुध भएपछि घरधनीले थाहा पाएका थिए । छिमेकीहरूसहित घरधनी गोठमा पुग्दा भैंसी घाइते र बाघ मरेको अवस्थामा फेला परेको थियो ।

खबर पाउनेबित्तिकै इलाका प्रहरी कार्यालय मनहरी र पर्सा वन्यजन्तु आरक्षण सुरक्षार्थ खटिएको मध्यवर्ती क्षेत्र पदमपोखरी सेक्टर लापमटार ब्यारेकबाट नेपाली सेनाको टोली घटनास्थलमा पुगेका थिए ।

भैंसीले सिङले हान्दा र कुल्चिँदा बाघ मरेको हुन सक्ने प्रहरीले जनाएको छ । घटनाको थप अनुसन्धान र पोस्टमार्टमका लागि मृत बाघलाई चितवन राष्ट्रिय निकुञ्ज, कसरा लगिएको प्रहरीले बताएको छ ।