चितवन-नारायणगढ बजार नजिक नारायणी नदी किनारमा आइतबार बिहान एक व्यक्तिलाई आक्रमण गरेर झाडीमा लुकेको बाघलाई १५ घण्टापछि नियन्त्रणमा लिइएको छ ।

चितवन निकुञ्जका पशु चिकित्सक र हात्तीसहित राष्ट्रिय प्रकृति संरक्षण कोष सौराहाको प्राविधिक टोलीले राति पौने नौ बजे बाघ नियन्त्रणमा लिएका हुन। बाघलाई डार्ट गरेर बेहोस बनाइएको छ भने निकुञ्ज लैजाने तयारी गरिएको छ ।

आइतबार बिहान ५ः२० बजे  नारायणी नदी किनारमा मर्निङ वाक गर्न गएका नारायणगढ बेलटाँडीका पशुपति श्रेष्ठलाई बाघले घाइते बनाएको थियो । बाघ नियन्त्रणमा लिन दिनभर तीन वटा हात्ती परिचालित गरिएको थियो । सौराहाबाट थप दुई हात्ती ल्याएर बाघ नियन्त्रणमा लिइएको जिल्ला प्रशासन कार्यालय चितवनले जनाएको छ ।