चितवन- त्रिशूली नदीमा बेपत्ता भएका ६५ यात्रुमध्ये ११ जनाको शव भेटिएको छ । चितवन, नवलपरासीको गैँडाकोट , त्रिवेणीको सुस्ता र गण्डक नहरमा ती शव भेटिएका हुन् ।
जिल्ला प्रशासन कार्यालय चितवनका अनुसार सनाखत हुन नसकेका शवहरू मध्ये तीन वटा भरतपुर अस्पताल र तीन वटा परासी अस्पतालमा राखिएको छ । पहिचान भएपछि ती शव पोष्टमाटम गर्दै परिवारलाई बुझाइने बताइन्छ ।
हालसम्म फेला परेका शवमध्ये सनाखत भएकामा भारत वेतियाका सजात अन्सारी, रौतहटका प्रकाश ठाकुर, चितवन माडीका विकाश परियार, सर्लाही वरथहवाका रमितकुशर माझी र भारत विहारका ऋषि पाल रहेका छन् ।
सिमलताल पहिरोमा परी दुर्घटनाग्रस्त बस अझै भेट्न सकिएको छैन भने नेपाल प्रहरी, शसस्त्र प्रहरी र नेपाल प्रहरीले खोजी कार्य जारी राखेको छ । हिजो चितवन आएका गृह सचिव एकनारायण अर्यालले बस खोज्न भारत वा चीनबाट विशेष उपकरण ल्याउने तयारी भइरहेको जानकारी दिएका थिए ।
गत शुक्रवार बिहान काठमाडाैँ गौरको बस र वीरगन्ज काठमाडाैँको बस भरतपुरको सिमलतालवाट त्रिशूलीमा खसेर बेपत्ता भएको हो। बसमा भएकामध्ये ३ जना पौडिएर बाँच्न सफल भएका हुन् ।
