नर्थ क्यारोलिना-चितवनबाट आई अमेरिकाको नर्थ क्यारोलिना राज्यमा बसोबास गरिरहेकाहरुको आइतबार ९ जुनका दिन वार्षिक भेटघाट तथा वनभोज कार्यक्रम गरेका छन् ।
सामाजिक सञ्जाल फेसबुकमा रहेको 'चितवने ईन आरटिपी' समूहको अग्रसरतामा राज्यको राजधानी राले क्षेत्रको केरिमा कार्यक्रम गरिएको हो ।
कार्यक्रममा नर्थ क्यारोलिना राज्यका विभिन्न ठाउँमा बसोवास गरिरहेका चितवनका बासिन्दा र अन्यसमेत गरी लगभग ६ सय जनाको सहभागिता रहेको थियो । त्यसअवसरमा भलिबल, बास्केटबल, सांगीतिक प्रस्तुति तथा बिंगो खेल आयोजना गरिएको जनाइएको छ ।
'चितवने ईन आरटिपी एनुयल मिट एण्ड ग्रिट प्रोग्राम' नाम दिइएको कार्यक्रमले चितवनबाट नर्थ क्यारोलिना आइ बसोबास गर्नेहरुबीच आपसी चिनजान तथा भेटघाट, सुख दु:ख साटासाट गर्ने र परदेशमा समेत आपसी भाईचार र बन्धुत्वको विकास गर्ने उद्देश्य राखेको आयोजकले जनाएका छन् ।
