चितवन–चितवनमा आज आएको भिषण हावाहुरीका कारण एक जना घाइते भएका छन् ।
रत्ननगर नगरपालिका वडा नम्बर ४ देवौलीमा आफ्नै घर भत्किएर च्याप्दा १६ वर्षीय सुरज माली घाइते भएका हुन् । उनको चितवन मेडिकल कलेजमा उपचार भइरहेको जिल्ला प्रहरी कार्यालयका प्रवक्ता भेषराज रिजालले जानकारी दिए। हावाहुरीले टिकौली जंगलमा रुख ढल्दा एउटा ट्रक र कारमा क्षति पुगेको छ । यस्तै, भरतपुर प्रहरी तालिम केन्द्रअगाडि पनि रुख ढलेर क्षति पुगेको उनले बताए ।
भरतपुर महानगरपालिका-१६ शिवघाटमा रुख ढल्दा बिजुलीको पोलमा क्षति पुगेको छ भने केही घरका जस्तापाता उडाएको छ ।
यसैगरी, नेपाल विद्युत प्राधिकरण भरतपुर वितरण केन्द्रका अनुसार हावाहुरीले एक सयभन्दा बढी बिजुलीका पोल ढलेका छन् । मर्मतका लागि कर्मचारी खटाइएको र सम्भव भएसम्मका स्थानमा विद्युत आपूर्ति पुनः सञ्चालन गरिने केन्द्रले जनाएको छ । पश्चिम तथा पूर्वी चितवनमा हावाहुरीले क्षति पुर्याएको जनाइएको छ ।
