चितवन–पूर्व–पश्चिम राजमार्गमा पर्ने नारायणी नदीमा करिब २ अर्ब रुपैयाँको लागतमा सिग्नेचर पुल बन्ने भएको छ । पुलको आज सोमबार एक समारोहबीच प्रधानमन्त्री पुष्पकमल दाहालले शिलान्यास गरे ।
विश्व बैंकको ऋण सहयोगमा अहिले रहेको पुलसँगै ४ सय २० लामो पुल बनाउन लागिएको हो । पुल निर्माणका लागि तु्न्डी कन्स्ट्रक्सनसँग २०८० जेठ १९ गते ठेक्का सम्झौता भइसकेको छ । एक्स्ट्राडोज्ड प्रविधिबाट बन्ने पुलको लागत १ अर्ब ८६ करोड ७६ लाख रहेको जनाइएको छ । २०८४ असारसम्म पुल बनाइसक्ने योजना छ ।
कम्पनीले पुलको डिजाइन तयार पारिसकेको छ । तर, स्ट्रक्चरको डिजाइन पुनरवलोकनका लागि कम्पनीका लागि भनिएको पुल महाशाखाले जनाएको छ ।
४ वटा सिग्नेचर पुल बनाउन विश्व बैंकसँग २०७५ मा सम्झौता भएकाअनुसार यो पुल बनाउन लागिएको हो । २ लेनको पुलमा यात्रुका लागि फराकिलो फुटपाथ रहनेछ भने पुलमा दुई वटा पाइलन राखिनेछ ।
