हेटौँडा: बागमती प्रदेशमा एकै दिन दुई पटक मन्त्रिपरिषद् विस्तार गरी मन्त्रीमण्डललाई पूर्णता दिइएको छ। मंगलबार सत्ता गठबन्धनमा रहेको नेकपा (एमाले) बाट चार जना मन्त्री थपिएका हुन्। 

बागमती प्रदेशका मुख्यमन्त्री शालिकराम जम्कट्टेलको सिफारिसमा बागमती प्रदेशका प्रदेश प्रमुख यादवचन्द्र शर्माले मङ्गलबार साँझ एमालेबाट चार जनालाई मन्त्री पदमा नियुक्त गरेका हुन् । प्रदेश प्रमुख शर्मासँग प्रदेश प्रमुखको कार्यालयमा आयोजित कार्यक्रममा  नवनियुक्त मन्त्रीहरुले पद तथा गोपनीयताको शपथ लिएका हुन् । 

एमालेबाट केशवप्रसाद पोखरेल, रामेश्वर श्रेष्ठ, एकलाल श्रेष्ठ र प्रकाश श्रेष्ठ मन्त्री नियुक्त भएका हुन् । केशवप्रसाद पोखरेललाई वन तथा वातावरण मन्त्रालय, रामेश्वर श्रेष्ठलाई स्वास्थ्य मन्त्रालय, एकालाल श्रेष्ठलाई खानेपानी, ऊर्जा तथा सिँचाई मन्त्रालय र प्रकाश श्रेष्ठलाई उद्योग, वाणिज्य, भूमि तथा प्रशासन मन्त्रालयको जिम्मेवारी दिइएको छ।

यसअघि मङ्गलबार बिहान मात्र मुख्यमन्त्री जम्कट्टेलको सिफारिसमा बागमती प्रदेशका प्रदेश प्रमुख शर्माले नेकपा (एकीकृत समाजवादी)का प्रदेश सभा सदस्य रमा आले मगरलाई मन्त्रीमा नियुक्त गरेका थिए । 

मन्त्रालयपछि तोक्ने गरी आलेमगरलाई बिना विभागीय मन्त्रीमा नियुक्ति गरिएको थियो। एमालेका चार मन्त्री थपिएसँगै मन्त्रीको सङ्ख्या १३ पुगेको छ।

सत्ता समीकरण परिवर्तन भएसँगै यसअघि चैत १५ गते हाम्रो नेपाली पार्टीबाट दलका नेता शैलेन्द्रमान बज्रचार्यलाई संस्कृति, पर्यटन तथा सहकारी मन्त्रालय र चैत १७ गते एमाले संसदीय दलका नेता जगन्नाथ थपलियालाई आर्थिक मामिला तथा योजना मन्त्रालयको जिम्मेवारीसहित मन्त्रिपरिषद् विस्तार गरिएको थियो।