काठमाडौंः रौतहटको परोहा नगरपालिका–९ स्थित शिव मनि ट्रान्सफरका सञ्चालकलाई गोली हानी भाग्दै गरेका तीन जनालाई प्रहरीले नियन्त्रणमा लिएको छ ।
अपराह्न १ बजेतिर मनि ट्रान्सफरका सञ्चालक २४ वर्षीय नितेश साहलाई गोली हानी भाग्दै गरेको अवस्थामा सशस्त्र प्रहरी बल नेपाल बोर्डर आउट पोस्ट रामपुरखापबाट खटिएको टोलीले उनीहरुलाई नियन्त्रणमा लिएको हो ।
घटनामा संलग्न भारत विहार पूर्वी चम्पारण मोतिहारी दीपही–२ बस्ने १८ वर्षीय किशोरसहित तीन जनालाई प्रहरीले पक्राउ गरेको छ । काउन्टरमा काम गरिरहेको अवस्थामा उनीहरुले सञ्चालक साहमाथि गोली प्रहार गरी फरार भएका थिए । घाइते साहलाई प्रादेशिक अस्पताल गौरमा सामान्य उपचारपश्चात वीरगन्ज रिफर गरिएको छ ।
प्रहरीले उनीहरुका साथबाट एक नाल कटुवा पेस्तोल र बिआर ०६ सिएल ९७९६ नम्बरको भारतीय मोटरसाइकलसमेत बरामद गरेको छ ।
*यसअघि ग्लोबल बैंकमा लुटपाट भनी प्रकाशित समाचार क्षमायाचनासहित सच्याइएको छ । सम्पादक
